في إعلانات جوجل، هل ممكن تدفع أقل من المنافسين وإعلانك يظهر قبل منهم؟

الإعلانات عبارة عن مزاد بين المنافسين، بس يا ترى المزاد في Google Ads بيشتغل ازاي؟

المزاد في Google مش بيكون لأعلى سعر هتدفعه، المزاد بيكون لأعلى Ad Rank.

الـ Ad Rank هو المقياس اللي بيتحدد بناءً عليه مين يظهر ومين لأ، ومين إعلانه يظهر قبل التاني، ومين يدفع أقل ومين أكتر.
المعادلة بتكون كالتالي:
Ad Rank = Bid × Quality Score

الـ Bid هو أقصى مبلغ مستعد تدفعه للكليك Maximum CPC.
الـ Quality Score هو تقييم Google لجودة إعلانك من 1 إلى 10، وبيتشكّل من خمس عوامل رئيسية:

1. Expected CTR:
الـ CTR هو نسبة النقر على إعلانك من إجمالي عدد مرات ظهور الإعلان.
جوجل بتتوقع الرقم ده بناءً على تاريخ الـ Keyword بشكل عام.
الـ Keyword اللي عندها CTR تاريخي ضعيف، جوجل هتفترض إن الإعلان مش جذاب وتخفض تقييمه.

2. Ad Relevance:
مدى تطابق الإعلان مع الـ Keyword.
يعني لو حاطط Keyword بتقول “شركة شحن في القاهرة”، الإعلان المفروض يتكلم عن الشحن في القاهرة.
لكن لو صيغة إعلانك مفيهاش حاجة من الـ Keyword دي، Google هتخفض تقييمه.

3. Landing Page Experience:
الـ Landing Page هي الويب سايت اللي بيوصله الزائر بعد ما يضغط على الإعلان، ‏جوجل بتقيّمه بناء على 3 عوامل:
هل محتواه مفيد؟ واضح ومباشر مفيهوش خداع؟ سلس في التصفح؟
لو إعلان بيقول “خصم 50٪ على الشحن” لكن لينك الإعلان بيوصّل الزائر لصفحة مفيهاش حاجة عن الخصم ده، ده بيقلل من تقييم الإعلان.

4. أداء الحساب الإعلاني التاريخي:
جوجل مش بتبص على الحملة الحالية بس، بتبص على كامل سجل الحساب الإعلاني.
لو حساب قديم وعنده تاريخ أداء كويس، الحملات والـ Keywords الجديدة بيكون تقييمها أفضل من حساب جديد لسة بادئ من الصفر.

5. تجانس الـ Keywords جوة كل مجموعة إعلانية:
لو حطيت Keywords مختلفة ملهاش علاقة ببعض في نفس الـ Ad Group، الإعلان الواحد مش هيكون مناسب لكلهم، وبالتالي التقييم هينزل.
فلو بتبيع أحذية وشنط مثلا، لازم كل واحد فيهم يكون في Ad Group مستقل بإعلاناته والـ Keywords الخاصة بكل واحد فيهم.

الخلاصة: الـ Bid مش هو بس اللي بيتحكم في مركز ظهور إعلانك، لو إعلان حاطط حد أقصى لسعر الكليك 5 جنيه مثلا بس الـ Quality Score بتاعه 9 من 10؛ هيكسب المزاد ويظهر فوق إعلان تاني حاطط Max CPC 10 جنيه بس الـ Quality Score بتاعته 4 من 10.

في Google Ads، الجودة بتشتري اللي الميزانية لوحدها مش قادرة تشتريه.

#ماركتنج_بالعربي #DigitalMarketing #MuhammadWagih #QualityScore #GoogleAds