هنفترض إن عندك مطعم، وعملت إعلان، الإعلان ده صرفت عليه وليكن 150 جنيه وجالك منه عميل واحد بس، العميل ده طلب أوردر بـ 200 جنيه، يبان إن الإعلان ده خسران صح؟ لأن أكيد مكسبك من العميل ده ميجيبش حق الإعلان اللي صرفته .. مظبوط؟
طيب لو العميل ده بعدها بشهر طلب أوردر تاني، بس المرة دي مفيش إعلان خلاص، هو جالك من أول إعلان وطلب نفس الأوردر بـ 200 جنيه برده، وفضل كل شهر يطلب نفس الأوردر لمدة سنة مثلا، كده العميل ده دفعلك على مدار السنة 2400 جنيه، فأكيد مكسبك منهم أكتر بكتير من الـ 150 جنيه اللي صرفتهم على الإعلان.
هو ده بقى الـ LTV اللي هو اختصار Lifetime Value.
الـ LTV بيخليك بدل ما تسأل نفسك: “هل أنا كسبت من أول بيعة؟” بتسأل: “هل أنا كسبت العميل ده؟”
وهنا الحسابات بتختلف تماما
طيب ليه معظم الناس مش بتحسبه صح؟
لأن الحساب بيحتاج بيانات تاريخية Historical Data، وفي ناس كتير مش بتتتبع سلوك العميل بعد أول عملية شراء.
بيشوفوا الـ ROAS على أول Conversion ويحكموا على الإعلان من غير ما يحسبوا الـ LTV اللي ممكن يغير المعادلة تماما من خسرانة لكسبانة.
والأخطر من كده إنهم ممكن يوقفوا حملات كانت “خسرانة” في أول بيعة بس هي في الحقيقة كانت بتجيب عملاء بـ LTV عالي جدًا.
ازاي تحسب الـ LTV؟
الـ LTV ببساطة = متوسط قيمة الطلب × عدد مرات الشراء في السنة × عدد السنوات
مثال:
متوسط الطلب = 500 جنيه
معدل الشراء = 4 مرات في السنة
العميل فضل معاك = سنة كاملة
يبقى الـ LTV =
500 × 4 × 1 = 2,000 جنيه
إزاي بيأثر على قرارات الإعلان؟
1. بيحدد الـ Max CPA الحقيقي: مش لازم تكسب من أول بيعة، ممكن تكسب العميل نفسه.
الـ Target CPA المقبول = نسبة من الـ LTV مش من قيمة أول أوردر.
2. بيفرق في قرار الـ Scale: لو الـ LTV عالي، ممكن تتحمل تكلفة CPA عالية في مقابل إنها هتقل مع الوقت اللي العميل بيفضل مكمل معاك فيه.
3. بيوجّه الـ Retention: زيادة الـ LTV بنسبة 20٪ ممكن يكون أرخص وأسرع من خفض تكلفة الاكتساب Aquisition بنفس النسبة.
وافتكر دايما: تكلفة الحفاظ على عميل حالي أقل بكتير من تكلفة اكتساب عميل جديد.
