تحديث جديد في إعلانات Meta:
قبل كده Meta كانت بتحسب الـ Click في الـ Attribution بشكل واسع جدًا:
الـ Click كان بيتحسب إنه Click سواء كان مجرد Like للبوست أو Share أو حتى Save post، ده طبعا غير الـ Click الفعلي اللي هو الضغط على لينك الويب سايت اللي في الإعلان.

يعني لو حد عمل Like على إعلانك واشترى بعدها بيوم؛ Meta كانت بتحسبها Conversion في إعلانك.

لكن Google Analytics في نفس الوقت مش شايف ده خالص لأنه بيحسب Link Click بس.

فاللي كان بيحصل إن الـ Ads Manager بيقول إن في 100 Conversions بس GA4 بيقول إنهم 40 بس!

وفي الواقع ده مش خطأ في الـ Conversion Tracking ده كان فرق في تعريف الـ Click بس، لكن دلوقتي Meta قررت أخيرًا تصلّحه.

بداية من مارس 2026، Meta أعلنت إن الـ Click-Through Attribution هيبقى مخصص للـ Link Clicks بس.
أما اللايك والشير والحفظ فاتنقلوا لتصنيف جديد اسمه Engage-Through Attribution.

يعني أرقام الإحصائيات في الـ Ads Manager ممكن تنزل، مش لأن الحملة بقت أضعف، ولكن لأن التعريف بقى أكثر دقة.

التغيير التاني: الـ Engaged View Window قلّت
قبل كده الشخص اللي اتفرج على 10 ثواني من الفيديو واشترى في نفس اليوم كانت بتتحسب Conversion.
دلوقتي التحديث بقى 5 ثواني بس.

والسبب إن Meta قالت إن 46٪ من المبيعات اللي بتيجي من الـ Reels بتحصل في أول ثانيتين بس.
يعني الـ 10 ثواني كانت زيادة عن اللزوم.

طيب إيه اللي لازم تعمله دلوقتي؟
– أولا متقلقش لو لقيت الإحصائيات عندك قلّت عن قبل كده، قارن أداء الحملة بالأرقام الجديدة ببعضها، مش بأرقام قبل التحديث.
– فعّل Engage-Through Attribution في التقارير، ده بيديك الصورة الكاملة: Link Clicks + التفاعلات مع بعض.
قارن Ads Manager بـ GA4 دلوقتي، المفروض الفرق بينهم يبقى أقل بكتير من قبل كده. لو لسه في فرق كبير يبقى فيه مشكلة في الـ Tracking محتاج تحلّها.

إيه رأيك في التحديث ده؟ تفتكر هيكون حاجة أفضل ولا قلقان من إن أرقام حملاتك هتبقى أقل من قبل كده؟