جربت قبل كده ترفع ميزانية حملة شغالة معاك كويس علشان تحقق أرباح زيادة ولكن النتيجة كانت عكسية الميزانية زادت بس النتائج مزادتش وتكلفة النتيجة زادت؟!

أو عندك حملة شغالة كويس وحابب تزود الميزانية بتاعتها علشان تحقق مبيعات أكتر؟
ده اللي هنشرحه دلوقتي واللي بيسمى بالـ Scaling.
الـ scaling معناه إنك بتزود ميزانية الحملة بتاعتك علشان تعمل زيادة في المبيعات والأرباح.
يعني لو عامل إعلان بميزانية يومية 100 جنيه وبيجيبلك 20 رسالة في اليوم مثلا؛ لكن انت عايز تزود الرسايل تخليها 100 رسالة مثلا، فالمنطقي انك بترفع الميزانية من 100 جنيه إلى 500 جنيه، ولكن اللي بيحصل إن بدل ما مفروض يجيلك 100 رسالة ممكن ميجيش غير 50 بس! وبدل ما كانت تكلفة الرسالة 5 جنيه بتلاقيها رفعت لـ 10 جنيه مثلا!
طيب إيه السبب؟؟
السبب إن رفعك للميزانية بنسبة كبيرة فجأة كده بيعمل لخبطة في الخوارزميات، لأن السيستم كان مظبط نفسه على ميزانية معينة وبدأ يستقر عليها فلما ترفعها فجأة بنسبة كبيرة بيسبّب عدم استقرار في الحملة.
وإيه الحل؟
الحل إنك هتزود الميزانية تدريجيا، بحيث إن الزيادة دي متكونش أكتر من 20‪%‬ كل 3 أو 4 أيام، فلو ميزانيتك الأساسية 100 جنيه في اليوم مثلا أو 3000 لمدة شهر -لو مفعّل ميزانية مدى الحياة Lifetime Budget-، يبقى هتزود 20 جنيه بعد 3 أو 4 أيام بحيث تبقى الميزانية اليومية 120 جنيه، وبعد 3 أو 4 أيام تانيين هتزود 24 جنيه مثلا وهكذا، أو تخلي ميزانية مدى الحياة 3600 وبعد 3 أو 4 أيام هتزود 720 جنيه وهكذا، وهتفضل تزود بالطريقة دي لحد ما توصل لأقصى مبلغ تقدر تصرفه على الإعلان أو لحد ما النتائج تبدأ تضعف وتكلفة النتيجة الواحدة تزيد فكده معناه إن إعلانك وصل للحد الأقصى اللي ممكن تجيب منه عائد كويس.
ولكن قبل ما تزود الميزانية وتعمل scaling، في حاجات مهمة لازم تاخد بالك منها الأول:
1️⃣ إن الحملة تكون شغالة كويس وبتحقق معاك نتائج كويسة بالفعل، لأنك لو عملت scaling لحملة مش شغالة كويس ومش بتحقق نتائج كويسة فانت كده بتزود خسارتك مش العكس.
2️⃣ إن معدل التكرار frequency لحملتك مش عالي، تعرف ده ازاي؟
هتروح لتقرير الإعلان في مدير الإعلانات وتختار توقيت الإعلان آخر شهر مثلا، ومن قسم columns هتختار delivery، وتشوف العمود الخاص بالـ frequency اللي هو معدل تكرار ظهور الإعلان لجمهورك المستهدف:
🔘 لو معدل التكرار أقل من 3 كده حملتك تمام مفيهاش مشكلة انك تعملها scaling.
🔘 لو معدل التكرار من 3 لـ 6 كده ممكن تعمل scaling برده بس تكلفة التفاعل الواحد هيعلى معاك شوية.
🔘 لو معدل التكرار أكتر من 6 كده إعلانك ميت مينفعش تعمل معاه scaling، لأن لو عملت scaling إعلانك هيفضل يكرر نفسه قصاد نفس الجمهور، فلازم تغير من استهدافك إما تغيره تماما وتختار جمهور تاني، وإما توسع نطاق الاستهداف بتاعك سواء من خلال الخريطة أو من خلال إضافة اهتمامات أكتر، ويفضل إنك تعمل جمهور مخصص Custom Audience من الناس اللي تفاعلت مع إعلاناتك خلال آخر مدة معينة وتعملهم استبعاد علشان الإعلان ميظهرش تاني ليهم.


3️⃣ إن الحملة تخطت مرحلة التعلم Learning Phase، والمقصود بيها ان الاعلان حصل على 50 نتيجة على الأقل خلال أسبوع (هيتم شرحها بالتفصيل في مقال قادم)، فلو إعلانك لسة جديد استنى لما يتخطى المرحلة دي ومتعملش أي تعديلات جوهرية في الحملة قبل ما تعمل scaling.

4️⃣ لو عندك أكتر من مجموعة إعلانية داخل نفس الحملة ومقسم الميزانية عليهم، فعّل خيار CBO ‪(‬Campaign Budget Optimization‪)‬ من القسم الرئيسي للحملة Campaign Level.


5️⃣ مش معنى إنك زودت الميزانية إنك هتفضل تحصل على نفس تكلفة النتيجة اللي حققتها مع الميزانية الصغيرة، فلو لقيت تكلفة الرسالة مثلا زادت عن الأول فكده انت محتاج توسع نطاق استهدافك علشان تزود عدد الجمهور، وأفضل حاجة تعملها بخصوص النقطة دي إنك تعمل جمهور مشابه Lookalike Audience من الجمهور اللي تفاعل معاك قبل كده Custom Audience بس هتخليه لوحده في مجموعة إعلانية جديدة Ad Set، وممكن برده تعدل على المجموعة الإعلانية اللي موجودة بالفعل وتزود في عدد الاهتمامات Interests أو توسع النطاق على الخريطة بحيث تزود عدد الجمهور المحتمل Potential Reach‪‬.
6️⃣ لو عامل أكتر من إعلان في نفس الحملة، أكتر من نَص Text وأكتر من صورة أو فيديو، اعمل مقارنة بينهم وشوف مين أكتر إعلان فيهم حقق نتائج كويسة وكمّل عليه ووقف الباقيين لو أداؤهم مش كويس.
طيب افرض معنديش وقت أنتظر زيادة 20%‬ من الميزانية كل 3 أو 4 أيام ومحتاج أرفع ميزانية الإعلان بشكل سريع؟
ساعتها هتحتاج تعمل حملة جديدة تماما وتستغنى عن الحملة القديمة وتحدد الميزانية اللي محتاجها في الحملة الجديدة مرة واحدة، بس لازم تاخد بالك إنها برده هتحتاج فترة تفضل في مرحلة الـ Learning Phase لحد ما تجيب 50 نتيجة على الأقل علشان توصل لمرحلة الاستقرار، زائد إن الإعلان بالطريقة دي ممكن يظهر لنفس الجمهور اللي شاف إعلانك القديم، فالحل إنك تستبعد كل من تفاعلوا مع الإعلان القديم أولا من خلال إنشاء جمهور مخصص Custom Audience زي ما تم توضيحه في النقطة رقم 2 الخاصة بمعدل التكرار Frequency.