ما أفضل استهداف؟! وكيف تصل إلى عميلك المستهدف ؟ (مقال)

سؤال متكرر بيجيلي علطول

أنا عندي صفحة متخصصة في بيع “كذا” .. إيه أفضل استهداف ؟

الجواب: مفيش حاجة كده !

مفيش حد هيقدر يحددلك استهدافك أكتر منك انت .. ليه ؟ لأن انت أدرى الناس بشغلك مينفعش حد تاني هو اللي يقولك اختار كذا وكذا.

انت بتحط نفسك مكان العميل اللي هيشتري منك -وانت أدرى الناس بمواصفات العميل ده- فبتبدأ تشوف العميل ده اهتماماته إيه على فيسبوك ، مش لازم تكون اهتمامات متعلقة مباشرة بنفس الحاجة اللي انت بتبيعها.

يعني مثلا انت بتبيع عقارات غالية ؛ فمش شرط تختار عقارات بس ، لأن ناس كتير أوي مهتمة بالعقارات: الغالي والرخيص ، الفاخر والشعبي ، شقة ولا فيلا … إلخ

انت بتشوف جمهورك ده ممكن تكون مواصفاته إيه بشكل عام Buyer Persona ، فلو بتبيع عقارات غالية هتبدأ تفكر إن العميل ده ممكن يكون ليه اهتمامات بأسواق البورصة العالمية مثلا ، أو أكيد عميل عند بنك من البنوك الأجنبية الكبيرة ، أو أكيد عنده عربية غالية من الماركات الكبيرة فأكيد مهتم بمتابعة أخبارها على فيسبوك ، أو غالبا هيكون بيسافر كتير برة مصر … إلخ

فبالتالي انت مش هتختار “عقارات” في الاهتمامات بس كده وخلاص ، لأ انت بتختار كل حاجة ممكن يكون هو بيعملها ومهتم بيها غير الناس التانية ، لأن الناس شرائح وكل شريحة ليها مواصفات معينة ، فبتحدد هو تبع أنهي شريحة والشريحة دي اهتمامتها وسلوكها وصفاتها إيه وبناء عليه بتحدد اهتمامات الجمهور ده وبتختارها ضمن الاستهداف بتاعك.

فبالتالي لا أنا ولا غيري هيقدر يقولك اختار كذا ومتختارش كذا لأن كل واحد أدرى بشغله وهو أكتر واحد يقدر يحدد الجمهور بتاعه.

ولو الموضوع صعب فالفيسبوك سهلّه ليك بإنه عملك زرار الاقتراحات Suggestions في قسم الاستهداف ، يكفي انك تحطله استهداف واحد أو أكتر وتضغط على الزرار ده وهو هيبدأ يقترح عليك أفضل الاقتراحات القريبة للاستهدافات اللي بتحطهاله وتختار منها المناسب ليك.

وممكن تعمل حركة كويسة علشان تضمن إن الجمهور اللي هتحددله اهتمامات وسلوك ده مهتم بالحاجة اللي انت بتبيعها فعلا وهي إنك تعمل Narrow Audience ، بمعنى إنك هتحط مثلا كل المواصفات بتاعة جمهورك المستهدف زي ما قلنا مثلا البورصة والعربيات والبنوك إلخ وبعدين تضغط على Narrow Audience وتحط فيها “عقارات” بس ، كده انت بتقول للفيسبوك أنا عايز الناس المهتمة بالبورصة والعربيات والبنوك “وفي نفس الوقت” لازم يكونوا مهتمين بالعقارات ، علشان لو معملتش كده هيجيبلك أي حد مهتم بالبورصة حتى لو مش مهتم بالعقارات ، أو أي حد مهتم بالعربيات حتى لو مش مهتم بالعقارات ، وبالتالي هتلاقي إعلانك بيظهر لجمهور كبير مش مهتم وممكن ميكونش ضمن الشريحة اللي انت محددها ، فكده انت بتضمن إن جمهورك بينطبق عليه الشرطين مع بعض مش شرط واحد فيهم بس.

وبرده متنساش اختيار الاستبعاد Exclude people علشان تستبعد الناس اللي “شغالة” في العقارات أو البورصة أو العربيات لأن دول اهتماماتهم بالمجالات دي لأنهم شغالين فيها مش لأنهم عايزين يشتروها أو بيمتلكوها.